Zijue Siri Tano(5) Za Nyuki Unazoweza Kutumia Kutengeneza Utamu Wa Maisha Yako.

Nyuki ni miongoni mwa wadudu wanaotengeneza zao ambalo lina sifa za kipekee. Nyuki hutengeneza asali ambayo inasifika kwa utamu, kwa sababu ya utamu huo mkubwa, watu wanadiriki kufananisha asali hiyo na mapenzi. Zaidi ya utamu huo, asali inatumika kwa matibabu ya magonjwa mbalimbali. Hili ni zao ambalo linatengenezwa na mdudu nyuki.

Wapo wadudu wengi wenye umbo kama nyuki, kwa mfano inzi, licha ya umuhimu wao, lakini hawana uwezo wa kutengeneza zao tamu la kusifika kama lilivyo la nyuki. Tumekuwa na hamu ya kuwa na mafanikio mazuri yenye furaha, amani na utele; yaani maisha matamu. Kama nyuki ana uwezo wa kutengeneza asali yenye utamu usio na kifani, basi kutakuwa na siri ambazo unaweza kujifunza kwake na kuleta utamu kwenye maisha yako. Hizi ndiyo siri unazoweza kujifunza;

Haangalii udogo wake. Kama ukianza kwa kuonja asali kisha kutafuata nani anayetengeneza asali hiyo, huwezi ukadhani kuwa nyuki ndiye mhusika. Akili yako ingeweza kufikiri kuwa ni binadamu au mnyama fulani mkubwa ndiye mhusika wa kutengeneza asali hiyo. Lakini nyuki hakuangalia maumbile ya wanyama wengine na kufikiri kuwa hao wangefaa kutengeneza asali hiyo, bali aliiangalia uwezo alioanao ndani yake bila kujali umbo lake akatengeneza kitu chenye thamani kubwa sana. Mara ngapi umefikiri kuwa vitu vizuri inabidi vitafutwe na vimilikiwe na watu wa fulani huku wewe ukijiona hustahili? Utauleta utamu kwenye maisha yako baada ya kujiamini kuwa na wewe unaweza kuzalisha kitu cha thamani ambacho kitahitajika na watu wengi hapa duniani.

Haangalii nani anatumia. Nyuki kutengeneza asali ni sehemu ya maisha yake. Haangalii kama binadamu au nyani atakuja kutumia asali hiyo. Unapoishi maisha yako kwa kutimiza kusudi lako kwa kutumia kila zawadi uliyopewa, utawanufaisha watu na mara nyingine bila kujua. Jifunze siri hii kwa nyuki, licha watu kuendelea kufaidika kwa zao analolitoa, hajawahi kuacha kutengeneza. Ishi kusudi lako bila kujali nani anayefaidika.

Umoja. Asali inayosifika kwa umuhimu na utamu haitengenezwi na nyuki mmoja. Moja ya siri inayowafanya nyuki wafanikiwe katika zoezi hili ni umoja. Wana umoja wa hali ya juu sana, wakishirikiana bila ya kutegeana kulingana majukumu yao. Ndugu, utaleta mafanikio makubwa na matamu kwenye maisha yako, kama utashirikia vema na watu sahihi. Hakuna jeshi la mtu mmoja kwenye kusaka mafanikio makubwa na matamu bali ungana na watu watakaoendelea kukutia moyo hata pale unapokuwa unakwama.

Hataki usumbufu kazini. Nyuki huwa mkali sana akisogelewa kwenye eneo lake la kazi. Licha ya uwezo wake wa kutengeneza kitu kitamu lakini ana tabia ya ukali sana pale unapomsumbua. Pia hukuachia maumivu makali na nundu pale anapofanikiwa akakung’ata. Unahitaji kuwa mkali kwa usumbufu wowote unaojitokeza pale unapokuwa busy unafanya vitu vya maana. Usiruhusu mtu au mitandao ya kijamii iharibu umakini wako unapofanya kazi zenye mchango mkubwa wa maisha yako.

Malkia anayefanya kazi. Kwenye kila kundi la nyuki, kuna nyuki mmoja anayeitwa malkia. Huyu ndiye boss wa kundi zima na angeweza kukaa na kustarehe wakati wengine wakiendelea kufanya kazi. Lakini vitu ni tofauti kwani yeye ndiye mhusika pekee wa kutaga mayai kwa ajili ya uzalishaji. Hata kama utakuwa na umati wa watu wanaokusaidia, uwe mbebaji namba moja wa jukumu la kuzalisha mafanikio yako.

Hizi ndiyo siri tano za nyuki anazozitumia kutengeneza utamu unaotafutwa dunia nzima. Anza kutumia siri hizi kutengeneza utamu wa maisha yako. Ona kuwa una kitu cha thamani kubwa ndani yako unachoweza kuipa dunia, shirikiana na watu wengine kutengeneza utamu huo, huku ukibeba wajibu wa moja kwa moja wa kutengeneza mafanikio matamu maishani mwako.

Imeandikwa na Alfred Mwanyika
Kocha na Mwalimu wa uwezo wako halisi
Mawasiliano;
Simu; 0752206899/0714301952
Barua pepe: alfred@amshauwezo.co.tz

Tovuti: www.amshauwezo.co.tz